網紅的藏寶箱書生捕獵團（下）
上集：https://bit.ly/3hWLRm4
做官夫人雖然威風，但做唔到丫嘛。
以小姐嘅樣貌家世，做唔到官夫人，但嫁個富家公子做少奶奶，真係一啲難度都冇。
點解一定做官夫人呢？點解要對嗰啲負情薄倖嘅書生，有咁多幻想呢？
件事好明顯，書生一係考唔中科舉，一係考中咗，覺得自己高貴咗，就翻面唔認人。
小姐淚流滿面：「我阿爹係商人，我係商人個女。我唔想我嘅丈夫、我嘅下一代都係低賤嘅商賈！」
總之，小姐就係要堅持呢條錯誤嘅路。
直到有一次，小姐「遇到」柳公子。
柳公子唔算好靚仔，但有一種憨厚樸實嘅氣質，好似會守承諾咁。
小姐施展混身解數勾引佢，佢偏偏唔鍾意大家閨秀，睇中咗小家碧玉……即係我。
柳公子好似柳下惠咁拒絕小姐，不斷表達對我嘅好感。
柳公子含情脈脈咁望住我，柳公子真心真意咁愛上我，柳公子誓神劈願咁應承我。
呢一次，反而係小姐憂心忡忡咁望住我。
小姐冇嫉妒我，柳公子只係佢其中一個獵物，但小姐擔心，我會好似佢咁畀人呃。
我諗咗好耐，如果我唔捉緊柳公子，我可以嫁畀邊個？
大概係嫁一個管事，我生出嚟嘅仔女，依然係奴隸。
柳公子真係好有才華，佢話佢一定會考到科舉，一定會八抬大轎返嚟娶我。
如果我成功咗，我就係官夫人，就係小姐都要仰望嘅女人。
小姐已經失敗咗十八次，我作為第十九次，冇理由咁黑仔掛。
我鼓起勇氣，將自己交畀柳公子，將私房錢都畀晒佢。
柳公子同我依依惜別，上京趕考。
冇幾耐，我發現我有咗柳公子嘅骨肉。
而且，小姐都收到消息，柳公子中咗狀元！
我好開心，呢次仲唔到我做官夫人？
我等啊等，我個肚愈嚟愈大，我個仔出咗世，柳公子都冇嚟搵我。
我託人送咗好多封信去京城，都石沉大海。
隨住個仔一日一日咁長大，我終於確定，柳公子唔會返嚟。
柳公子，已經拋棄咗我。
呢個時候，小姐已經認命，嫁咗一個門當戶對嘅富家公子。
而我就帶住個仔，一個人生活。
條件好少少嘅管事，都睇唔上我。
我成日問自己，點解我係咁勸小姐，唔好信啲書生，但輪到我嗰陣，我都忍唔住淪陷咗。
因為「成為官夫人」實在太吸引，旁觀者睇到背後嘅陷阱，但身在局中嘅人，只會被迷人嘅果實吸引。
責備人哋傻嘅人，往往輪到自己嗰陣，都一樣咁傻。
—完—
新書《真實虛擬一鏡過》已經出版了，現正發售中，
詳情可點擊這裡：https://bit.ly/3eTPuHL
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #書生捕獵團
Search